دليلك الحديث المفيد... لإعفاء أخوك من التجنيد

 

الصورة أدناه هي الرسمية المتعلقة في الإدارة العامة للجوازات والهجرة والجنسية بالعباسية ومكتوب فيها الورق المطلوب لإعفاء أخوك من الجيش في حالة توافر الأتي فيك: 

 

 

1- معاك جنسية أو اقامة دائمة

2- انتوا اخين بس ووالدك معاش

3- لست على قوة شغل في مصر (بيتعرف من التامينات ولكن شخصيا انا فقط شيلت وظيفتي الحكومية من البطاقة لانه كان شرط ودا باخلاء طرف من جهة العمل وعمل بطاقة جديدة بمؤهلك الدراسي مثلا)

4- انت غير مطلوب للتجنيد شخصيا

بند 1و2و3 خاصين بيك مع ترجمة بند 2 (بيترجم عندهم في الإدارة العامة للجوازات والهجرة والجنسية وممكن تاخد الترجمة في نفس اليوم او يقولولك تعال كمان يوم او اتنين وانا ترجمت عندهم.. وممكن تترجمة برة برضو بس انا فضلت عندهم) بند 4 هتعمله لاخوك في مصر في الشهر العقاري او تعمله في السفارة وتبعتهوله (شخصيا عملته في مصر)

البنود من 1 لـ 4 هتروح بيهم مع اخوك للإدارة العامة للجوازات والهجرة والجنسية بالعباسية (اقرب محطة مترو هي العباسية هتطلع فوق وتركب ميكروباص بينادي جوازات ومتنساش تاخد اقلام معاك وصور من بنود من 1 لـ 4) وهناك هتطلع الدور السادس وهتسأل على شباك الاعفاء من التجنيد شقيق المهاجر وهتقدم كل الورق من 1 لـ 4 وهتملي استمارة وهيقولولك تعال كمان يوم او اتنين علشان هتاخد ختم صفة المهاجر على الباسبور وهتروح بعد المدة اللي قالوهالك وتاخد الختم بعد ما تمضي على استمارة وتملاها

بند 5و 6 هيقدمهم اخوك بعد سفرك وبند 6 هيطلع شهادة التحركات موجهة للتجنيد اللي انت تابع له من نفس المكان بالعباسية ببند 4 ويقدمه مع الورق... وشهادة التحركات بيعملها بعد ما تكون مشيت من مصر وبتطلع في نفس اليوم لو عملتها مستعجل وشهادة التحركات تكون حديثة.. يعني بعد سفرك لالمانيا بيومين تلاتة كويس (رفضوا شهادة تحركات شخص لانها طلعت بعد شهر من سفر اخوه المهاجر)

بالاضافة لبنود من 1 لـ 6.. هيقدم صورة من ختم صفة المهاجر اللي اتختمت على باسبورك وصورة من ختم خروجك من المطار.

لما اخوك يقدم كل ما سبق.. هتطلعله ورقة بعد يومين موجهة لمدير ادارة التجنيد اللي اخوك تابع له ومكتوب فيها ان اخوك اللي برقم عسكري كذا كذا تقدم بطلب للاعفاء من التجنيد نظرا ان اخوه فلان الفلاني بصفة مهاجر من تاريخ كذا كذا وان بعد الكشف تبين انه غادر البلاد بتاريخ كذا كذا.

اخوك هيروح ب"صورة" الشهادة دي مع "صور" من الاتي لمنطقة التجنيد بحلمية الزيتون:

1- قيد عائلي حديث

2- شهادة زواج الأب والأم

3- شهادة ميلادك وشهادة ميلاد الاخوة كلهم ولاد وبنات

4- صورة بطاقتك وبطاقة الوالد والاخوة

أخويا مشي في سكة تانية كمان كتسريع وانه قدم اونلاين على الموقع دا الخاص بالتجنيد انه عاوز اعفاء مؤقت وساب رقم تليفونه... فبعدها كلمه عسكري من مركز الشرطة اللي هو تابع له وقاله تيجي لشباك التجنيد وطلع ورقة * يروح بيها منطقة التجنيد التابع لها.. المهم لازم وانت هناك في مركز الشرطة و ببطاقتك الشخصية تطلع 6 او 7 جند علشان بدونها هيرجعوك من منطقة التجنيد اللي انت تابع بها https://tagned.mod.gov.eg/CertificateApplication.aspx...

اخوك هيروح ب "أصل" الشهادة مع الاتي ك"أصول" لمنطقة التجنيد التابع لها:

1- قيد عائلي حديث

2- شهادة زواج الأب والأم

3- شهادة ميلاد الاخوة كلهم ولاد وبنات

4- صورة بطاقتك وبطاقة الوالد والاخوة

5- 6 او 7 جند على حسب.. لو اخوك مواليد 2005 فما بعدها يبقي 6 جند لكن لو قبلها يبقي 7 جند (تشتريه من مركز الشرطة التابع له)

6- الورقة * (واضح انها ورقة ملهاش لزمة لان محدش بص فيها هناك بس احتياطي اعملها)

في منطقة التجنيد التابع لها (مش لازم يحلق وهو رايح).. هيقول انه عاوز شباك الاعفاء وهتطلعلك الشهادة في نفس اليوم بعد ما يصورك ويبصمك

الاعفاء بيبقي مؤقت ولو زال السبب بانك مبقتش مهاجر ودا بيكون بقضائك اكتر من 6 شهور متواصل في مصر او انك اشتغلت في مصر.. اخوك لازم يسلم نفسه للتجنيد.

اخوك يعمل صور كتيرة من كل الورق وخليهم معاه وبالتوفيق.