١- الابيض يتلغي من حياتك، جو محمد ثروت في طيور النورس ياللي مصاحبني ده تنساه... لأن النورس نفسه هيلبس غامق في المطرة دي اللي بتنزل تسيب في هدومك البيضا وجزمتك البيضا وقمصانك البيضا وحتى ليلتك البيضا علامات بتلغي اي حاجة بيضا في يومك الا النكت السخيفة البيضا اللي بتسمعها على حلاوة وجمال ام المطر
٢- اقتل فيروز... ايوة ده بلاغ للنائب العام مني بالتحريض على قتل فيروز في الراديوهات والموبايلات والساوندكلاودات واي حاجة بتطلع صوت بيقول نطرتك في الشتي... اللي بيتنطر ده بيبقى مية المطرة من كاوتش عربية وانت واقف مستني مكروباص العاشر ووصيتك كتبها حبيبك بالدمع الحزين يا حزين...
٣- لا تصطحب شمسية وتعتقد نفسك مواطن لندني في أروقة انجلترا.. المواطن الانزليجي ما بيركابش رابع ورا جنب اخواته... ولو ركب ومعاه شمسية مبلولة التلاتة اللي في الكنبة هيسمعوك الرعد جوة المكروباص لو مكنتش سمعته في الشارع
٤- هيقولولك هوت شوكليت... هيقولولك قهوة ساخنة في بلكونة ممطرة... هيقولولك قدح من الشاي على مقهى في منطقة بعيدة... تفافة على طول... كل ده يترفع من المنيو وتنزل بالعدس... عدس عدس عدس بلا شفقة او رحمة... تشرب عدس.. تاكل فتة عدس... تخرج بعدسك... تتوضى بعدس... تتليف بعدس... نجاتك في هذا الشتا مرهونة بكمية العدس اللي داخلة حياتك... ما دون العدس ليس الا هراء... اقولك... سيب الهراء واستخدم العدس...
٥- اكبر خدعة عملها الشيطان في تاريخ البشرية لما فهمك ان الجو ممكن يرجع يحرر تاني وترجع تلبس نص كم.. شوف يا عزيزي... لو الجو درجة حرارته بقت نفس درجة انصهار النحاس ما تقلعش البلوفر تاني... استغناءك عن فانلتك الداخلية بمثابة استقبال لعزرائيل بصدر رحب... الجو الفترة دي بيلعب لعبة بص العصفورة... وهوب تلاقي الالتهاب الرؤوي بيبوسك في بوقك حتى تستغيث
٦- تقف تستنى مواصلاتك زي الباشا في نص الشارع... هتقولي العربيات... هقولك تخبطك عربية والا تغرق في بلاعة مش باينة؟؟... هتقولي هغرق... هقولك مش عوامتك احسن بكتير ما تتكهرب في العمود اللي جنب المحطة؟ نزولك الشارع في الأجواء الممطرة عبارة عن محاولة نجاة متكررة لا يخوضها الا ابطال فيلم hunger games
٧- اللي يقولك اركن عربيتك في الجراش تحت... بضهر ايدك على وشه... ده عاوز يموتك.. الجراشات وخصوصا في التجمد الخامس مليانة تماسيح وسيد قشطة واناكوندات بتتغذى على العربيات واللي بيركبوها... اللي بتسمعوه بالليل ده مش صوت الرعد... دي اناكوندات جعانة في الجراش مستنياك تفكر تنزل تركن العربية جوة.
٨- استحمينا في الصيف كتير... الحمدلله... نتقل بقى... ونرسى كدة... موضوع قلع الهدوم ده لازم يتعمله دراسة جدوى علمية... وموضوع الحموم اعتقد لازم يتم بإذن من مفتي الديار المصرية... دي ارواح يا جماعة مش لعب عيال... تجهيز الحمام بفحم الكوك المستخدم في اذابة الصلب في مصانع الحديد القومية لم يعد خيارا... ولا فلفلا روميا...
٩- فكرة انك تروح اسكندرية في الجو ده لأي سبب غير انك ساكن هناك يستدعي تحويلك للطب النفسي للكشف على سلامة قواك العقلية... طبعا شايفك ياللي بتقول انا بحبها في الشتا... حبها يا حبيبي وافتكر ان من الحب ما قتل... الجيت سكي هناك بيستخدموه في الدليفري والاعاصير بقت برعاية فرغلي... عيش وسيبني اعيش...
١٠- استخدامك لأي نوع من انواع الذكاء والحنكة في تحديد مواعيد نشر الغسيل عبث... عبث لا طائل منه... محاولة لارضاء غرورك الزائف انك انتصرت على الجو ولحقت تنشره قبل ما تمطر... تعالى احسبها بقى... بتلاقي النتيجة سبعة وخمسين لواحد... يعني كل مرة بتنجح تنشر وتلم الغسيل ناشف في الجو ده بيقابلها فقدانك لأطنان من مسحوق الغسيل اللي بترجع تغسل بيه غسيلك اللي بتلمه بريحة باط الكلب بعد ما المطرة تنسفه على الحبل..
#لو_سمحت_عاوز_شيشة_عدس
#انا_داخل_استحمى
#يا_سبعاااااااااااااااااااااي
#اخر_ايام_الصيفية_الله_يرحمها
#شط_اسكندرية_يا_بلولولق_بلولولق_الحقووونااااي
#التيار_الكوميدي
0 تعليقات
أهلا وسهلا ومرحبا بك في موقع تغطية مباشر : ضع ردا يعبر عن اناقة أخلاقك ، سنرد على اي استفسار نراه يحتاج الى اجابة ، ادعمنا برأيك وضع تعليقا للتشجيع ..