ف البيت طريقة : سمك دنيس(dorade) مشوي بالزيت والليمون

ممكن بنفس الطريقه تعملي السمك البلطي كمان .

الطريقه:
نظفي واغسلي السمك كويس جدا واعملي في جسمه شقوق وسبيه يتصفي.
قشري توم كتير واهرسيه.
اعصري ليمون كتير(ومترميش قشر الليمون هقولك هنعمل بيه ايه).
افرمي حزمه كزبره خضرا.
اخلطي الليمون مع التوم مع الكزبره وحطي ملح وكمون وكزبره مطحونه وبابريكا وشويه بهارات سمك.
اخلطي كله سوا وبعد كده ضيفي زيت زيتون(ممكن زيت ذره بس زيت الزيتون احلى وافيد).
حطي كميه زيت كويسه هوه اسمه مشوي بالزيت والليمون
كميه الخلطه هتكون نسبه وتناسب مع كميه السمك الي هتعمليها
امسكي سمكه سمكه وتبيلها عالناشف من جوه وبره بكميه بسيطه بملح وكمون وكزبره وبابريكا الي هي نفس البهارات الي حطتيها في الخلطه.
وبعد كده احشيها بالخلطه الي عملناها
احشي بطن السمكه واحشي الشقوق الي فيه.
سيبي السمك يشرب التتبيله من نص ساعه لساعه
وبعد كده حطيه في صنيه بدون تغطيه ودخليه فرن حرارته ٢٢٠ ساخن مسبقا
لمده نصف ساعه
يعني ربع ساعه لكل ناحيه
بجد هتاكلوا احلى سمك❤️
قشر الليمون بقي هتعملوا ايه بيه؟؟
بعد ما تخلصي الاكل خالص هتدعكي بيها ايدك
هتروح منها ريحه الزفاره تماما وكمان ممكن تستخدميها في الحوض والمواعين
مبتخليش في ريحه ولا اثر لاي سمك😍

إرسال تعليق

0 تعليقات