تحضير الكشري المصري صلصاتوا وحركاتوا -- اوعي


الكشري المصري

الكشري اشهر طبق مصري على الاطلاق.يحمل فداخله الكثير من المتعه والاثاره في نفس الوقت لما يجمعه من توليفه رائعه ولذيذه من تقليه وصلصه ودقه.

تختلف طريقه تحضيره من منطقه لاخرى ولكن يظل في النهايه هوه طبق من اشهى الاطباق
الطريقه:
اول خطوات تحضير الكشري هتكون:
💕التقليه💕(وهي عباره عن البصل المحمر الذي يوضع على وش طبق الكشري)
ازاي بقي تعملي البصل محمر ومقرمش 👍🏻
قطعي البصل الي انصاف حلقات، سخني مقلاه واسعه وضعي بها كميه وفيره من الزيت وضعي فيها البصل (اهم حاجه البصل ميبقاش فوق بعضه عشان يتحمر كويس)
اول ما البصل يبدا يصفر خفيف رشي الملح على البصل .
قلبي البصل عده مرات لحد ما يتحمر وياخد اللون الاحمر الجميل وبعد كده شليه من الزيت وحطيه على مناديل المطبخ للتخلص من الزيت الزياده فيه واتركيه جانبا.
دلوقت عندك الزيت الي اتحمر فيه البصل ده هتستخدميه لباقي عمل الكشري .
💕صلصه الكشري💕:
حطي شويه من الزيت الي اتحمر فيه البصل وشوحي فيه توم مفروم واول ما التوم يتحمر حطي عليه طماطم معصوره وعليها صلصه طماطم(طبعا كميه التوم والطماطم والصلصه نسبه وتناسب على حسب ما تحبي).
حطي على الصلصه ملح وكمون وشويه كزبره مطحونه ولو تحبي حطي ماجي.
خلي الصلصه تغلي على نار متوسطه مرتين وبعد كده حطي عليها ملعقه خل. وخليها تغلي تاني لمده خمس دقايق وبعد كده اطفي عليها.
💕الدقه💕:
بنحط في طاسه صغيره او حله صغيره شويه زيت ونشوح فيها توم مفروم واول ما التوم يصفر طشي التوم بالخل هتشمي ريحه تذهب العقول
خففي التوم مع الخل بنص كوب ميه ثم اضيفي الملح والكمون وطبعا ممكن تضيفي الماجي بس خلي بالك من الملح .
💕المكرونه💕
اسلقي المكرونه اي شكل تحبيه انا شخصيا كل مره احطب نوع شكل بحسه تجديد عن المعتاد.
بعد ما تسلقي المكرونه عادي جدا صفيها وحطيها فالحله تاني وقلبي معاها شويه من الزيت الي قليتي فيه البصل😉
💕العدس💕
اغسلي العدس وصفيه (العدس البني اسمه عدس بجبه).
حطي حله على النار فيها ميه وحطي فيها العدس .
حطي في ميه العدس شويه من الزيت الي قليتي فيه البصل😉
وحطي ملح وكمون وماجي وشويه من التقليه الي عملتيها وسيبي العدس يستوى تلات ارباع السوا او اكتر شويه.
لازم الميه تكون مغطيه العدس بشويه وهوه بيتسلق.
اما يقارب العدس على الاستوا تكوني غسلتي الارز وصفتيه(اصل الكشري استخدام الارز المصري بس ممكن تعمليه بالبسمتي بيكون طعمه جميل جدا)
هتحطي الارز في نفس ماء سلق العدس ومع العدس وتظبطي كميه الميه وتظبطي الملح بتاعك وبعد ما يغلي الماء توطي النار وتسبيه يستوي.

العدس بيكون نص كميه الارز وممكن تزودي كميه العدس لو تحبي.
💕عند تقديم الكشرى
بتحطي الارز مع العدس وعليه المكرونه وعليه من فوق التقليه والحمص(انا نزلت طريقه عمل الحمص منفصله قبل كده)
وتستمتعي باضافه الصلصه والدقه على الطبق حسب الرغبه
والف هنا❤️

إرسال تعليق

0 تعليقات