طريقة عمل :: طاجن بسله بالجزر بصدور الدجاج

بحس الطريقه خفيفه جدا للبسله وطعمها لذيذ
مختلفه عن طريقه المعتاده لطبخ البسله بس هتعجبكم باذن الله.
اول حاجه جهزي كل الحاجات الي هتستخدميها
قطعي بصله متوسطه 

.

قطعي تلات فصوص توم شرايح
قطعي نص حبه فلفل رومي اخضر
حضري البسله وقطعي الجزر حجم متوسط او صغير حسب الرغبه
اعصيري تلات طماطم فالخلاط
وقطعي صدور الدجاج شرايح استخدمت صدرين كبار.
نبدا الطبخه بقي👍🏻
على النار حطي حله فيها شويه زيت وممكن معلقه سمنه صغيره بتخلي الطعم غني ولذيذ او معلقه زبده.
شوحي البصل لحد ما يصفر حطي التوم واول ما ريحته تطلع
حطي الفلفل الرومي وقلبي خليهم يتشوحوا حبه سوا وبعدها نزلي معاهم الفراخ وقلبي لحد ما الفراخ يبقي لونها ابيض
دلوقتي نزلي البسله مع الجزر وقلبي كله سوا وغطي الحله ووطي النار خالص عشر دقايق.
دلوقتي حطي عصير الطماطم ومعلقه كبيره صلصه الي هي معجون طماطم هتدي طعم ولون حلو للطبق.

دلوقتي حطي ملح وفلفل اسود فقط وانا كمان بحب احط مكعب ماجي معاها وقلبي وعلي النار وسبيها تغلي وبعد كده خلي النار متوسطه لحد ما تستوي البسله
طبعا احرصي انه نسبه الصلصه بتاعت البسله تكون مناسبه وحلوه لكميه البسله والجزر.
دلوقت بقي في بايركس او صنيه او طاجن صبي البسله ودخليها فرن من غير غطا
احنا عاوزينها تاخد لون جميل وتاخد تشميعه الفرن فقط
وفي اختيار تاني انك تسيبي البسله فقط تغلي فوق البوتجاز وبعدها تصبيها في الطاجن وتغطيها كويس بورق الفويل وتدخليها الفرن تكمل سواها وفي الاخر تشيلي الغطا تاخد لون جميل
طريقه التسويه دي اختيارك انتي 😍
وتقدم جنب رز ابيض بالشعريه

إرسال تعليق

0 تعليقات