ميزة جدول التنقل

جدول التنقل

طريقة عمل المسقعه من المطبخ #المصرية

من اشهى والذ الاطباق الشعبيه فالمطبخ المصري
ويتجمع افراد الاسره عليها في وجبه الغدا او العشا مع طبق شهي جدا بمذاق الفلفل الحار
ممكن تتعمل ساده او باللحمه المفرومه وممكن بالبشاميل


هقولكم طريقه المسقعه الاصليه على اصولها
قشري الباذنجان (استخدمت تلاته)وقطعيه ارباع او انصاف سميكه نسبيا
وحطيها في مصفاه ورشي عليه شويه ملح عشان ينزل ميته.
قطعي فلفل حار
قطعي بطاطس(استخدمت ٤ كبار) صوابع وحطيها في ميه وملح
اقلي الباذنجان وقبل ما تحطيه فالزيت اضغطي عليه ضغطه خفيفه عشان يخرج بقيت الميه الي فيه.
اقلي البطاطس.
اقلي الفلفل.
سبيهم على ورق تصفيه الزيت على جنب.
لعمل صلصه المسقعه
شوحي بصله مقطعه جوانج رفيعه في قليل من الزيت اول ما تدبل شوحي معاها حوالي 7 فصوص توم كبار مقطعه شرايح رفيعه.
بعد ما يتشوحوا انزلي عليها بعصير طماطم(اربع طماطمات)
مع ملعقه كبيره صلصه مليانه
ونص كوب ماء
اخلطيهم معا وظبطي الملح
حطي فلفل اسود وكزبره ناشفه مطحونه وكمون وممكن اضافه الماجي
سيبي الصلصه تغلي على نار متوسطه لمده خمس دقايق
ثم ضعي الباذنجان والفلففل والبطاطس قلبيهم بخفه جداا واخلطيهم بالصلصه واتركيها تغلي مره واحده فقط
واطفي عليها النار
وحطيها في طبق التقديم وسبيها تبرد خالص(ماهي اسمها مسقعه بتتاكل ساقعه)
لو عاوزه تعمليها باللحمه المفرومه هتتبعي نفس الخطوات بالظبط وبعد ما تعملي الصوص هتضيفي عليه لحمه مفرومه معصجه وتخليها تغلي معاها ثم تضيفي عليها الباذنجان والفلفل والبطاطس

إرسال تعليق

0 تعليقات