جزر المالديف معلومات للأطباء العرب العامليين هناك ... جديد التفاصيل

هكتب رايي في المالديف... لسببين ... الاول..ان في ناس بتسالني كتير عنها... الثاني... ان ربنا قدر ليا ان معظم اطباء مصر من كبار وصغار يعرفني او عالاقل سمع عني.... واظن ان كثير من الناس حتي وان خالفوني في افكاري ...لكنهم يعلمون او يظنون اني لا اكذب واحاول ان اقول الحق ولا اجَمّل .
..واقول ما في نفسي ولا ابالي قدر الامكان... وللاسف دا هو اللي وصلني لحياتي اللي انا عايشها الان مطرود من بلدي او مطارد..ولو كنت بعرف اسكت او اداري او ا*رض كان زماني عالاقل خلصت ماستر بتاعي وانا اضطريت اهرب واسيب البلد وكان فاضل لي شهرين وامتحن الجزء التاني وابقي اخصائي... ناهيكم عن معاناتي مع اهلي وعيلتي .. بقول الكلام دا لان في مصريين للاسف بيبعتولي بيقولوا لي ان في مصريين معاكم بيخوفونا من اننا نيجي نشتغل في المالديف... وكمان بيقولوا إن في معانا حد او مجموعة بيستغلوا الناس وياخدوا منهم فلوس ظلما وبهتانا عشان يجيبوهم.... اذا حد جه عن طريق مكتبنا او كان د. محمد الهواري اتوسط له وانضحك عليه او الهواري خد منه فلوس لنفسه ياريت يوريني انضحك عليه في ايه....
اسمي مؤمن عبدالعظيم... طبيب مستشفي المطرية .... صاحب حادثة اعتداء امناء الشرطة في مستشفي المطرية.... واللي زمايلي الكرام من اطباء مصر عشان خاطر ينصروا الحق حضروا في اكبر جمعية عموميه في تاريخ مصر وتاريخ العمل النقابي في بلدنا
رايي في اللي انا شفته وعيشته في خلال ال10 شهور اللي عشتهم هنا.... كالاتي
المالديف بلد فيها نظام وفلوس اقل من الخليج شوية وراحت بال وهدوء..
..والجميل انك مش حاسس ان حد ماسكك من رقبتك او احسن منك لمحرد انه مواطن وانت غريب... لا تشعر ان المواطن يتميز عليك الا في انهم يبصبروا عليه اذا اخطا اكثر من صبرهم عليك... فغلطتك انت بعشرة من غلطات المواطن... وهذا في نظري عدل .... لابد ان يشعر المواطن ان بلده تعزّه اكتر من اي حد... ومفيش حساب الملكين والذل اللي تتذله في الخليج في خطا مهني... ولكن اقصي شئ هو الرفد
انت اعلي مرتب في الدولة كلها .... مديرك في الشغل بياخد اقل منك وهو ابن البلد ورئيسك
باسبورك معاك ومحدش بياخدوا منك زي الخليج وتعيش زي الموالي او الرقيق لا تذهب او تاتي الا بأمر سيدك الكفيل كما في الخليج
. عندك وقت تذاكر وتشتغل وتنام وتروح البحر... يوميا...الشغل 8 ساعات وباقي اليوم اون كول.... في الاغلب في اليوم ممكن تشوف لو في جزيرة لواحدك... من 10 الي 30 حالة... معظمهم في ال 8 ساعات... وكام حالة علي باقي اليوم... وبوم الجمعه احازة مفيهوش 8 ساعات شغل لكن بتبقي اون كول تروح تشوف الحالة وترجع مطرح ما كنت ..بيتك او الكافيه او البحر 🙂.... اي ساعة او دقيقة شغل زيادة عن ال8 ساعات بيتحطلك في مرتبك... والساعة بحوالي 5 دولار
الشغل بسيط جدا...من وجهة نظري.. لو قسمت 20 حالة الصبح... وكل حالة 10 دقايق... يعني هتاخد بتاع ساعتين شغل بس
وباقي اليوم انت متردد عالسنتر لو اتصلوا بيك...... وانت كدا كدا جوه الجزيرة... متفرقش في وجهة نظري الا لو انت عاوز تخرج كل شوية... بس هنا مفيش خروج اكتر من اللي هيتوفر عندك في جزيرتك... هنا مفيش رفاهية غير العاصمة... غير كدا كله سواء
معظم الناس طيبين ... مسالمين... فيه امان ... كل واحد في حاله..يخدموك زي اخوهم ويدفعوا عنك لو حسوا انك تحبهم وعاوز تعاشرهم ومش بتتكبر عليهم او حاسس انك اعلي منهم عشان طبيب او تنزوي وتبعد عنهم عشان غريب.... ممكن تلاقيهم بيتكلموا علي بعض وعليك... بس دا عادي بحكم الفضا وروقان البال اللي هم عايشين فيه.... زي ما هتلاقي انهم متواضعين في اغلبهم وممكن تلاقي ان الفراشه اللي في الشغل معاك أخوها او ابنها المدير بتاعك... ومحدش هنا احسن من حد الا لو حد كان واطي وقليل الادب فهتلاقي كل الناس يتجنبوه ودول الحمدلله قليلين... واغلبهم الناس دول سياسيين مش هتتعامل معاهم الا فيما قل وندر... للاسف فيهم الشحن علي بعض لطلب الحكم والعمل مع الغالب في سياسة الدولة... مثل كل دول العالم التالت
في برتيش كاونسل لو عاوز تمتحن ايلتس
جالية الاطباء المصريين في معظمهم من احسن الناس اللي ممكن تقابلهم... يساعدوا بعض من غير ما يعرفوا بعض... ولا يشوفوا بعض من اساسه.... لانك بتبقي بطولك في الجزيرة لو روحت سنتر مش مستشفي
بالنسبة لشرط اللغة... وهم كانوا زمان غيروا الشرط بتاعةاللغة وكانوا بيكتفوا... انك تجيب شهادة الثانوية العامة مكتوب فيها ان لغتك الاولي الاجنبية الانجليزي وشهادة من كلية طب بيقولوا فيها ان دراستك كانت بالانجليزي
باقي الورق بتطلعه انجليزي وتختمه خارجية... او بتطلعه عربي وتترجمه انجليزي
هنا كلنا مقدمين من مكتب توظيف...... لان دول بيخلصوا الورق... لكن لو قدمت لوحدك غالبا مش حياخدوك... لان الموظفين بياخدوا فلوس من المكاتب... فبيسلكوا الدنيا....
والمكتب بتاعنا مضمون... ومش تدفع حاجة الا لما تمضي العقد
في اقل من 10 جم عن طريق الوزارة بدون مكتب وسيط... بس دا زمان قبل 2017 .... لكن الان الوضع صعب... بسبب فساد الموظفين... والرشاوي اللي تدفعها مكاتب التوظيف ليهم...
المكتب بياخد تقريبا مرتب شهر.... بعد ما تمضي العقد وقبل ما تتوزع علي جزيرتك
العقد مدته سنة ...قابلة للتجديد... بشرط نجاحك في امتحان المعادلة المالديفية في خلال السنه اللي هتشتغلها.... واول 3 شهور يحق لكلا الطرفين الغاء العقد بدون إبداء اسباب.... وممكن تقدم استقالتك قبل معاد سفرك ب3 شهور... وليك احازة طوارئ 10 ايام مدفوعين الاجر ... و15 يوم بدون أجر...بس انت بتسافر مثلا وتطلع وتيحي من الجزيرة علي حسابك... هم بيوفروا لك تمن الطيارة وانت رايح وانت جاي بعد انتهاء 12 شهر عمل
مفيش اي تمثيل دوبلوماسي لمصر.... ودا شئ في الاغلب كويس... 🙂... لكن اكتشفنا ان بتوصل للسفارة المصرية في سيريلانكا اخبارنا ... ولو حد حابب يتواصل معاهم براحته... وربنا ما يحوجنا للناس دي ويبعد عيونهم عننا
______________________
لكن فيها عيوب... مثلا
انك محلك سر ومفيش تقدم خالص
مفيش مكان للخروج...الفسحة هو انك تنزل البحر او تصطاد وبس.... الجزيرة هنا شبه القرية لو انت عشت في الصعيد او اشتغلت فيه... شبه القري في سوهاج وقنا واسوان...زي مثلا تلاقي لبسهم بسيط وطبايع الناس لسه بخير وان كلهم قرايب بعض ومتجوزين من بعض
وممنوع تطلع بره الجزيرة الا بإذن من الإدارة... لان مفيش حد غيرك طبيب... فلو حالة طارئة جت لازم حد يبقي موجود يلحقها.... فخروجك له ترتيبات
واللغه هناك انجليزي
وممكن لو غلطت او حصلت مشكلة حتي شخصية بالذات مع الادارة ممكن تترفد بدون مقدمات... لان 10 منك بقرش وواقفين عالباب منتظرين... من مصريين وبنجال وهنود ونيبال وباكستانيين... ومفيش جهة ممكن تتظلم لها مثلا... لان هنا في لا مركزية في اتخاذ القرارات اللي زي دي...ومفيش حد يجرأ يهينك او يعلي صوته حتي عليك... لان لو عمل كدا تقدر تشتكيه للشرطة... التعامل بصوت واطي وبحزم وبدون مذلة او انتقاص حتي ولو كنت مخطئ
والاقامة بتقعد في اوضة بحمام والمطبخ مشترك و لو عاوز تاخد شقه اوضتين بصاله وحمام ومطبخ بس تدفع ايجار الضعف ...
والاكل هنا... الخضار والفاكهة قليل ... نوعين او 4 مدام بعدت عن العاصمة
لكن تقدر تحيب اللي انت عاوزه من المتاح في جزيرتك
وتوفر لك اخر الشهر....
لو قاعد في اوضة... هتصرف في الشهر 500 دولار... شاملة كل شئ ......ودا اللي بصرفه انا ومراتي وبنتي 4 سنين.... ولو في شقة لوحدك هتصرف حوالي 700 الي 800 في اغلب الاحوال... لكن ممكن اكتر... لان السكن وتوافره بيختلف من جزيرة للتانية علي حسب المساحة وعدد السكان بتوع الجزيرة واسعار السكن
ومرتبك لو مش معاك ماستر حوالي 1700 دولار... ولو معاك ماستر حوالي 3250 دولار
مفيش كنيسة لو انت مسيحي ممكن تروحها في كل المالديف....
دي كانت العيوب بالنسبه ليا اللي شايفها... غير كدا يبقي كله تمام
لان في ناس مستحملتش
ويا اما مشيو ... يا اما عمالين يلعنوا اليوم اللي جم فيه وبيشتموا في البلد وكارهينها وبيعدوا الايام عشان السنه تعدي ويمشوا يمشوا
_______________
انا قولت كل اللي اعرفه وما في ظني اراه الحق في خير البلد وعيوبها..ويعلم الله لو في منغعه او مضرة غير ما قولت... ما كنت اخبيها عن احد
فكر وشوف انت تتحمل ايه
ولا يكلف الله نفسا الا وسعها
وربنا ييسر لعباده الاصلح لحياتهم وانفسهم
واصلح الله حال بلادنا فلا نغادرها ابدا... ونشوف بلدنا احسن من المالديف ومن الخليج
وردنا الي بلادنا سالمين غانمين

Mo'men Abd El-Azim‎