اقمشه الثياب الرجاليه بمناسبه العيد - اسماء - اسعار

دخلت كل المحلات وتفرجت على كل الاقمشه اللي ابحث عنها .. اللي هو قماش يكون مشروك بنسبه قطن بسيطه .. من 5 الى 15 بالميه ..وكل ماشفت قماش سجلت اسمه والسعر على شان اقارن وبعدين رجعت اتفرج عليها على شان اقرر ..

اعطيكم زبده التجربه .. وكلها بنفس المستوى مايفرق الترتيب..


( الكسائي )

المعيقليه فيها فرعين جمب بعض .. فيه فرع يبيع قماش الملبا ( الجديد ) من شركه تويوبو اليابانيه نازل بخمس الوان الطلب عليه كبير والخامه في نظري جميله للي يحب الثوب الطايح تطلع عليك القطعه ب 190 ريال 4.5 متر .. طبعا يعتبر غالي نوعا ما لان باقي قيمه التفصيل واكيد بتختار خياط مضمون يعني بالميت بيكون ب 100 الاجمالي 290 ريال !


**رحت للفرع الثاني للكسائي لقيت عندهم قماش نفس الملبا تقريبا ولا فيه فرق كبير اسمه ( VIP ) فيه نسبه قطن 5 بالميه برضه من شركه تويوبو على ما اظن سعر القطعه 150 ريال 4.5 متر اخذت قطعتين وخلوها لي 5 متر لان الخياط اللي افصل عنده مايقبل الا 5 امتار !


( محل قطني )
عندهم مجموعه مميزه حقيقه ونفس الشي اقمشتهم يابانيه اميز الاقمشه اللي اخذت منها ..
قماش ( بطران ) الثوب 4.5 متر ب90 ريال على ان سعره رخيص بس قماش فوق الممتاز
قماش ( امازون ) المتر مابين 35 الى 30 ريال قماش قريب من بطران بس انه اثقل شوي
قماش ( فابيو ) المتر 28 ريال
قماش ( خليجي ) المتر 25 ريال

هذي تجربتي مع قطني وحقيقه متخيل اقمشتهم بتكون مميزه باللبس ان شاءالله ..


( محل باكرموم )
عندهم اقمشه مميزه جدا مخلوطه مع قطن طبيعي بنسب مختلفه .. طبعا بالنسبه لي اي ثوب فيه نسبه قطن يتكسر او يتعفط ما احبه لذلك اخذت اقمشه بنسبه قطن بسيطه ..

تجربتي مع اقمشتهم

قماش ( رويال ) الثوب 4.5 متر 120 ريال اذا 5 متر 150 ريال
قماش ( الزعيم ) الثوب 4.5 متر 120 ريال اذا 5 متر 150 ريال
قماش ( شقران ) بنسبه قطن طبيعي 15 بالميه مميز جدا سعر القطعه للثوب 5 متر 110 ريال
قماش ( تايفون ) بنسبه قطن طبيعي 7 بالميه سعر القطعه للثوب 100 ريال


( محل بقشان )
ماجربت من عندهم شي بس شفت قماشين كويسين ماعليهم
قماش ( ويكتوريا او فكتوريا )
قماش ( ريتشي ) وهذا اسم القماش اذا مانسيت يجي منه انواع لها ارقام ما اذكرها حقيقه


من تجربتي الخاصه احرص على الشركات اليابانيه المعروفه

تويوبو - شكيبو - كورابو - نشنبو

شركات على مستوى عالي واقمشتهم تزين مع الغسيل .. طبعا هذي تجربتي الاولى في شراء اقمشه متنوعه من محلات متخصصه ولا بالعاده مثل ماذكرت سابقا اختار القماش من الخياط او اشتري قطعه من برا بس بدون تركيز ومعرفه الفروقات ووش اللي يناسبني اكثر !


طبعا هالموضوع اتمنى يكون تفاعلي من كل الاعضاء يحطون تجاربهم او اي معلومات عندهم عن الاقمشه الرجاليه بما اننا في موسم رمضان الله يشرفه الكل يحرص على التفصيل قبل العيد ..

ملحوظه : ياليت اللي يقدر يذكر اسم الخياط اللي يتعامل معه بعيد عن التفضيل بينهم لان كل واحد وله رأي اكيد .. وعلى شان اللي يبي يسال عن خياط معين يراسل العضو او يساله مباشره ..
وبالنسبه للي يشتري ثوب فيه نسبه قطن 10 بالميه وفوق لازم ينقعه بالمويه يوم كامل افضل
خياطي : بلان

وفقا للمصدر