الأخبار

كل ماتريد معرفتة عن البورد العسكري المصري الجديد

حكاية البورد العسكري بإختصار
ممكن ناس كتير مش هتصدق إن أنا كنت شغال في واحده من أكبر المستشفيات العسكريه في مصر تقريبا لمدة سنه بحالها وسيبتها بقصه ظريفه مش وقته أحكيها دلوقتي


المهم إن في خلال السنه دي قربت قوي من إدارة المستشفى وعرفت جزء كبير من مشاكل المستشفيات دي 
المستشفيات دي بتبقى كبيره قوي وفيها إمكانيات عاليه قوي ومصروف عليها بالعبيط بس مشكلتها دايما العامل البشري بالذات في الأطباء لأن عدد أطباء الجيش قليل قوي بالنسبه لعدد المستشفيات العسكريه ومعظمهم - ماعدا اللي عندهم واسطه طبعا - مسحولين في تشكيلات في محافظات حدوديه لأنهم بيخدموا كعسكريين وكأطباء
القسم في المستشفى من دول بيبقى فيه طبيب واحد عسكري او اتنين بالكتير قوي وكمان معظمهم بيبقوا عالمعاش ومستدعين او شغالين بعقود
النقص في الإستشاريين بيتغلبوا عليه بالتعاقد مع أساتذة الجامعه اللي غالبا مابيبقوش فاضيين وبييجوا يادوب عالعيادات أو عالعمليات او عالحالات لو في تخصص مافيهوش عمليات
المشكله الكبيره قوي في النواب او اللي بيسموهم بالدلع مساعدين أخصائيين ودول غالبا بيفضلوا انهم يكونوا معاهم ماجستير وبيكونوا شغالين في الجامعه او مستشفيات تعليميه او حتى وزارة صحه ولأنهم مطحونين فبيكونوا زي الفواعليه كل يوم في مستشفى شكل ومش فاضيين أو متفرغين للمستشفى العسكري وبيعملوا مشاكل كتير في النباطشيات وكمان في إستمرارية الخدمه ورعاية المرضى ودايما عنده نقص ومشكله في الفئه دي
الأطباء دول كمان بيشتغلوا باليوم يعني ايام ماكنت في المستشفى كانت النبطشيه 24 ساعه بحوالي من 350 ل 400 جنيه وبتوصل ل 500 أو 600 جنيه في بعض التخصصات وده بيكلف المستشفى مبالغ كبيره
مش عارف مين بقى أبن العفريته اللي فكر في موضوع البورد العسكري وضرب بيه كذا عصفور بحجر
أولا: هيبقى عنده أطباء بصفه مستمره ويقدر يشغلهم نبطشيات و إقسام زي ماهوا عايز لمدة 5 سنين بحجة الزماله
ثانيا: مش هيدفع مرتبات للدكاتره دي لأنهم هيشتغلوا عشان ياخدوا الزماله
ثالثا: مش بس كده ده هياخد من الدكاتره دي 15 الف جنيه في السنه ( يابن اللعيبه )
عشان يديهم الزماله اللي كده كده لازم يدفعوا رسوم امتحاناتها ولازم يمتحنوها
رابعا: فتره انتقاليه لغاية لما تتخرج دفعات كليه الطب العسكريه اللي بالصدفه فاضلهم تقريبا 5 سنين عشان اول دفعه تتخرج ويقدروا ينزلوا شغل في مستشفيات ويعوضوا النقص الموجود في الأطباء وساعتها غالبا هيتقال لدكاترة الزماله أمكوا في العش ولا طارت ... بيتك ... بيتك
اخيرا نسيت أقول إن المستشفيات العسكريه دي أغلبها مفتوح للمدنيين بطريقه إستثماريه وبينافسوا أكبر المستشفيات الخاصه في الأسعار وفي الخدمه الفندقيه وغالبا بتبقى المنافسه لصالح المستشفيات العسكريه بسبب الإمكانيات الكبيره اللي عندهم واللي أصلا متموله من ضرايب الشعب ومواردهم في حين إن ماحدش يقدر يسأل عن أيرادات المستشفيات دي بتروح فين أو إذا كان بيدفعوا ضرايب عالمكاسب ديولا لأ ( مابيدفعوش وعن تجربه شخصيه )
عرفتوا الفوله ... طب بالهنا والشفا

وفقا للمصدر 

إرسال تعليق

0 تعليقات

مفضلتي

معدل الحفظ: 0%