طرق السفر الغير تقليدية الى استراليا للأطباء

  ( البوست دا مبنى على شوية معلومات جمعتها أو عشتها بنفسي وفيه آراء شخصية ...انا فى استراليا من 10 شهور بس ...انا مش شغال كطبيب هنا انا بدرس طب صيني .... فمن فضلكم بلاش اسئلة معقدة عن حالتك انا معنديش خبرة كافية عشان اجاوبك ) 

حضرتك مطالب بالتقصي عن اى معلومة هنا انت ناوي تستفاد منها او تستخدمها 

 معظم المعلومات هنا مكررة وسبق ذكرها ولكن فى الاعادة إفادة.
# الأطباء و العاملين فى القطاع الطبي من أقل الناس حظا فى السفر لإستراليا كهجرة (إقامة دائمة ) لأن الشرط مكلف جدا ....لازم المعادلة كاملة و سنة كاملة بعد العمل بتقييم جيد للحصول على الترخيص وبالتالى التقديم على الإقامة ... حتى الناس اللى بتحصل على فرصة عمل بالجزء الاول ودا بقي فى تخصصات قليلة جدا ، فى اول سنة هم تحت تهديد الترحيل لو حصل خلاف او عدم توفيق فى العمل ( الحمد لله دا نادر و الطبيب فى معظم الأحوال بيحصل على إقامة دائمة بعد سنه ونص - سنتين من وصوله استراليا).
>>>>>>>>>>>>>>>>

 

# اسؤا حظوظ الطبيب انه يكون مخلص المعادلة كاملة ومش لاقى شغل بحجة ان مفيش خبرة داخل البلد ... ودا ممكن يحصل خصوصا فى حالة انعدام الخبرة لتخصص مطلوب ..... هنا الإقامة الدائمة و التواجد داخل البلد بتكون طوق النجاة لانك كمقيم ومخلص جزء اول وتانى لك الفرصة فى التدريب داخل المستشفيات او الدخول فى برنامج الحكومة السنوى لاعداد الجي بي ( الكلام دا محتاج تفاصيل مش وقتها ) وساعتها هتقدر تاخد خبرة محلية و بسهولة ان شاء الله تلتحق بوظيفة من مئات وظائف الجي بي المطلوبة فى كل الولايات.
# دا الطريق التقليدي اللى كل الناس عارفاه ... الكلام هنا عن الطرق الغير تقليدية اللى ممكن الطبيب يسافر بها استراليا و اللى ممكن الكتير يسمع عنها بدون تفاصيل او ممكن بعض الناس هنا تكون عنده الفرصة دى وهو مش واخد باله او خايف من مخاطر المصاريف .
>>>>>>>>>>>>>>>>
<<<<<<<<<<<<<<<<
>>>>>>>>>>>>>>>>
# أولا : الطبيب المستثنى من القاعدة السابقة هو طبيب التحاليل اللى معاه خبرة عمل داخل معمل تحاليل + ماستر كلينيكال باثولوجي أو دكتوراه و ساعتها بيقدم على هجرة باسم وظيفة تانية غير طبيب اسمها أخصائي معمل (Medical Laboratory Scientist) و دى تقدر تلاقيها على قائمة الوظائف المطلوبة فى اللنك دا كود 234611
https://www.border.gov.au/…/S…/skilled-occupations-lists/SOL
والتقييم للخبرة بيبقي تبع المعهد الاسترالي للابحاث الطبية مش APHRA او RACGP
http://www.aims.org.au/
ودا لنك تفاصيل تقييم الخبرة وشروطها ( فى 3 مسميات وظيفية خاصة بالمعامل )
http://www.aims.org.au/services/qualification-assessment
لازم تبعت كل ورقك وشهاداتك وشهادات الخبره الاول لل
AIMS
ويتم تقييمك وبعد ما يوافقوا عليك بيدوك الرقم اللي تحجز بيه الامتحان.... يعني ما ينفعش تمتحن من نفسك
الامتحان ب 800 دولار... وموجود في دبي و الرياض بس في الشرق الأوسط.
اسهل من المعادله بمراحل
بالذات للناس اللي بتشتغل في المعمل فعليا... امتحان كلينيكال باثولوجي بكل فروعه
Hematology
Clinical chemistry
Microbiology
Immunology
Pathology
Blood Banking
اضافات دكتور علي وهو عمل موضوع مفصل عن تجربته ونجاحه فى الحصول على الإقامة الدائمة بالاستثناء دا
التفاصيل: https://www.facebook.com/groups/993713937321092/permalink/1689708227721656/
>>>>>>>>>>>>>>>>
<<<<<<<<<<<<<<<<
>>>>>>>>>>>>>>>>
فحضرتك ممكن عن طريق وكيل هجرة تستشيره و تقدم على هجرة على الوظيفة دى وساعتها هتاخد تأشيرة للإقامة الدائمة تدخل بيها البلد و تقدر تشتغل اى وظيفة سواء اخصائي معمل و مرتبهم كويس او اى وظيفة كاجوال تصرف منها على المعادلة كطبيب لحد ما تخلصها وتشتغل كطبيب لو حابب . غير ان دخولك البلد و العيش فيها بحد ذاته هدف ( بغض النظر عن هتشتغل ايه ) و هتقدر تدرس اللى نفسك فيه باسعار مخفضة جدا خصوصا بعد حصولك على الجنسية.
# الطبيب التانى المستثنى هو مدير الوحدة الصحية بيقدم على وظيفة فى قائمة المهن المطلوبة اسمها primary health organization manager ولازم يكون بيشتغل فى الادراة فقط و اشتغل أكتر من ١٢ شهر ومش بيكشف على مرضى وبيتسأل عليك كويس فى الموضوع دا و السكة دى لها تفاصيل كتير مع وكيل الهجرة الاستاذ أحمد كمال شادي وبالفعل نجح احد الاعضاء هنا انه ياخد فيزا الاقامة الدائمة بالطريقة دى.
>>>>>>>>>>>>>>>>
<<<<<<<<<<<<<<<<
>>>>>>>>>>>>>>>>

# ثانيا : السفر عن طريق الزوج / الزوجة : ودى لها حالات كتير :
# الحالة الاولى: ان حضرتك تكون محظوظ بزواجك من دكتورة تحاليل معها خبرة وبالتالى سيادتك تصرف على توثيق خبراتها و السعى فى حصولها على تأشيرة الإقامة الدائمة و بالتالى حضرتك هتسافر معها كمرافق زوج ومعك نفس التاشيرة الإقامة الدائمة ( وتبقى تعتذر لها لو فى يوم اتريقت على التخصص بتاعها :)
أما لو حضرتك متزوج من اى طبيبة تانى او صيدلانية أو بيطرى أو اسنان فمعلش تتعوض الجوازة اللى جاية إن شاء الله :)
>>>>>>>>>>>>>>>>
<<<<<<<<<<<<<<<<
>>>>>>>>>>>>>>>>
# الحالة التانية : زوجة حضرتك وظيفتها مذكورة فى قائمة المهن المطلوبة للهجرة ومش من المجال الطبي اللى محتاج معادلة زي محاسبة مثلا او مهندسة بكل مجالاتها حتى الزراعية.... الخ ومعها خبرة وانجليزى و سنها معقول اقل من 32 ساعتها فرصتها هتبقى عالية فى قبول الهجرة ( هنا بتستشير وكيل هجرة الافضل قبل أي إجراء ومعانا فى الجروب راجل محترم اسمه أ.أحمد كمال شادى ممكن تستشيره ) عشان موضوع النقط .
- فى الحالة دى أنت هتدفع كل مصاريف الهجرة من أول التقييم لحد السفر و المعيشة داخل البلد مدة لحد لما تستقر بالعملة المصرية بتاعتك المنهارة فالتكلفة هتكون عالية لكن برضه تستاهل.
>>>>>>>>>>>>>>>>
<<<<<<<<<<<<<<<<
>>>>>>>>>>>>>>>>
# الحالة التالتة : وهى نفس الحالة التانية زائد فرصة المنحة ودى أفضل و اقل مصاريف و هنقول ازاى :
- لو حضرتك متزوج من متفوقة دراسيا لها فرصة المنح من جامعات استراليا ( الأسهل بكتير) أو عن طريق البعثات فى مصر وهو الأصعب ( مثال: معيدة فى الجامعة زى علوم أو هندسة أو حاسبات ومعلومات أو زراعة ..الخ )
استراليا بتستثمر فى الابحاث سنويا بالمليارات والمنح كتير جدا للطلبة المتفوقين سواء منح ماستر للخريجين بامتياز و الاوائل او منح دكتوراة بالذات لاعضاء هيئة التدريس .... انا قاعد فى كانبرا ( العاصمة) تقريبا 90 فى المية من المصريين اللى عرفتهم هنا جايين بمنح لهم ولازواجهم ما شاء الله ( حاسبات و هندسة ) و بعد ما بيجوا بيمشوا فى اجراءات الاقامة الدائمة.
- لازم تتعلم ازاى تقدم على المنح وازاى تراسل وتسعى فى دا شبه يوميا لمدة مفتوحة قد تصل الى 3 سنوات بدون يأس أو إحباط.
- لازم تدخل على كل جامعة و تراسل الدكاترة المشرفين بشكل شخصي و تشوف قائمة المنح اللى موجودة فى الجامعة. http://www.scholars4dev.com/4950/australia-scholarships/
- المنح مميزتها كتير خصوصا لو كاملة بمرتب و مصاريف مدارس مجانية للأولاد (فى منح بتبقى إعفاء من مصاريف الماستر او الدكتوراة بس.... رأيي بلاش منها خالص لان دى ماسورة مصاريف ... والانتظار للمنحة الكاملة اللى بتغطي التأمين الصحي وما سبق) و لو مجتش السنة دى يبقى السنة اللى جاية إن شاء الله .
( ملحوظة :الطبيب اللى جاى بعقد عمل وعنده 3-4 أولاد هيدفع فى السنة 5000 دولار لكل واحد مصاريف مدارس ) لحد لما ياخد الاقامة.
- هى هتسافر على حساب الجامعة ( إجازة دراسية) فى مصر كتذكرة سفر فقط (أعضاء هيئة تدريس ) لكن حضرتك والاولاد على حسابك ( ساعتها بيطلعلك فيزا مرافق بسهولة إن شاء الله )، هى هتاخد مرتب شهري من الجامعة يكفي فى الغالب السكن و جزء كبيرمن المعيشة ، مصاريف المدرسة للاولاد ببلاش ، المشكلة بس انهم بيأمنوها صحيا فقط و السفارة بتشترط عليك لإصدار فيزا مرافق تدفع تأمين صحي لك وللاولاد مدة المنحة كاملة ( 4 سنين مثلا ) ودا مبلغ محترم فى حدود 10-12 الف دولار و دا شرط جديد طبق حديثا.
- ساعتها هي بتحول التأمين الصحي بتاعها اللى الجامعة دفعته لها ( وهى فى مصر) من فرد الى عائلة اون لاين على موقع الشركة وتدفع الفرق على نفس الشركة لانه مينفعش انت والاولاد تشتركوا فى شركة تأمين تاني غير إن كده أرخص بالمناسبة .
-السفارة الاسترالية بالقاهرة هتقبل أى تأمين لأى شركة لكن المشكلة لما توصل استراليا مش هتاخد كارت التأمين لان حضرتك مرافق يبقى لازم تكون تبع نفس شركة التأمين ) ( دا خطأ فى السيستم عندهم أرجو انه يكون اتصلح لانه حصل معايا ) ( المعلومة دى افتكرها كويس لو انت من الناس اللى هتمشي فى الطريق دا )
- فلوس التأمين الصحي هترجع لك اول ما تحصلوا على الاقامة الدائمة لان ساعتها التأمين بيبقي حكومي ... هيتخصم منه المدة المستغرقة للحصول على الاقامة.
- مرافق الطالب ليه ٤٠ ساعه كل ١٤ يوم الا لو الطالب بيدرس ماستر فما فوق ساعتها المرافق له حق عمل غير محدود . ودا كافى تماما للعيش و كمان تساعد فى بعض مصاريف الاقامة لو حبيت.
* عضو هيئة التدريس دا ممكن يدخل الهجرة من أبواب وظائف هو مش عامل حسابه عليها لها علاقة بمجال كليته . مثال : المعيد فى حاسبات ومعلومات ممكن يدخل من باب مطور برمجة ( حتى لو هو أي قسم) لو أثبت فى شهادة خبرته من الجامعة انه اشتغل فى مشاريع لها علاقة بالمجال دا ودرسها للطلبة ( ساعتها بينزلوا فى التقييم سنتين من خبرته المكتوبة )
* كمان هنفترض ان حضرتك متزوج من خريجة هندسة قسم كهربا مثلا و لكنها حبت مجال البرمجة و اشتغلت فيه فى شركات كمبيوتر سنين طويلة .....في التقييم بينزلوها 4 سنين من خبرتها المكتوبة كمطور برامج وممكن تقدم على وظيفة هى مش خريجة من كليه لها علاقة بيها. ( دى حالة انا شفتها ),,,,, وعلى ذلك فقس.
* تقييم الخبرات مش حالة ثابتة ، كل واحد له قصة و هو وحظه فى إثبات سنين الخبرة بس مسمعتش عن حد اخد نفس سنين الخبرة اللى كاتبها، وتانى وكلاء الهجرة اتوجدوا عشان المشاكل دى فلابد من الاستشارة .
* منحة ماستر الترجمة ( خريجي الالسن و اداب و دار علوم .. الخ ) بعد الحصول على الماستر والتقديم على الاعتماد داخل استراليا بيبقى لها 5 درجات زيادة فى سكور الهجرة ( كوظيفة مترجم ) وفى ناس كتير واقفة على ال 5 درجات دول !

* التلاعب او الكذب فى اى شهادة عواقبه الذهاب ورا الشمس ... حضرتك مش بتقدم ورق لناس مختومة ... دول بيستقبلوا الاف المهاجرين سنويا من 50 سنة على اقل تقدير... فبلاش فهلوة وفزلكة عشان خاطرى.
# الحالة الرابعة : التزوج من مواطنة استرالية يمنحك اقامة مؤقتة ولك حق العمل و بعد سنتين من مكوثك داخل استراليا متزوج منها بتاخد اقامة دائمة . الزواج لازم يكون حقيقي و تثبه بطرق مختلفة. ولو ثبت التلاعب او حصل انفصال قبل حصولك على الاقامة الدائمة هتترحل.
>>>>>>>>>>>>>>>>
<<<<<<<<<<<<<<<<
>>>>>>>>>>>>>>>>
# طرق فاشلة لدخول البلد كطبيب:
1- الدخول بفيزا دراسة ( ماستر علوم صحية مثلا) اختراع فاشل لانك هتدفع 25 الف دولار للسنة الواحدة مصاريف دراسة غير السفر ومش هتستفاد اي حاجة في موضوع الاقامة او التدريب في المستشفيات لانهم هيرفضوا تدريبك اكيد.
الكلام دا لو هتغير الوظيفة فبتاخد شهادة داخل استراليا تشتغل بيها ( مثال دبلومة سنتين) مع ان الاسهل والارخص تخلص المعادلة كامله بالفلوس دي
2- الدخول بمنحة دراسية جامعية كالدكتوراه مثلا..... نفس الكلام اللي فوق... مش هتديك اقامة ولا تدريب ولا هتستفاد اي حاجة لانها شهادة بحثية مش عملية فهتتكلف مصاريف سفر علي الفاضي، غير انك هتسافر بمفردك لانك مش هتدفع 12 الف دولار تامين صحي للاسرة علي 3_4 سنين وترجعوا مصر تاني!
3 - دفع مال لمواطنة استرالية عربية للزواج منها لضمان الاقامة.... ياما غرق في الطريق دا كتير ومنهم مصريين للاسف... امشي عدل عشان ربنا يبارك لك في حياتك.
4 - قوارب الهجرة زي اللي عندنا لايطاليا بس دي بتطلع من اندونيسيا وغينيا الجديدة... ودي مصريين رشقوا فيها برضه وحكوا لي معاناتهم والاهوال اللي شافوها! هو اللي ممكن يحصلك ان حد يضايق منك من المهربين فيرميك في البحر بس.. غير ان استراليا بقت تعرف تتصرف مع القوارب دي وترجعها تاني. ( من اشهر جراحين العظام العرب في استراليا دخلها علي ظهر قارب تقريبا كان عراقي) بس الكلام دا كان زمان دلوقتي خلاص انتهي الموضوع.
القانون اتغير ٧/٢٠١٣ و اللي بيخش بقارب مستحيل يقدر يقدم على اقامة دائمة و لا كطبيب و لا زوج و لا الدموع

المصدر :: 
 
Islam Raslan