كل ماتريد معرفته عن العيشة في سلطنة عمان للمدرسين

العيشة والسكن وهتصرف كام ،، واد ايه سعر السكن والمصروف او الراتب هيكفي ولا لأ .. مبدئيا كدة بما ان دا موسم البحث عن سفر للخارج خاصة المعلمين ..
الرواتب ف عمان من ٢٠٠ : ٤٠٠ ريال
أقل من كدة استهبال ..

متقبلش بالقليل انت مش رخيص .. متخليش حد يستغل احتياجك للسفر ويضحك عليك ..

*** الرواتب أقل من 300 ريال مينفعش أسرة خااااالص .. يدوب ع حد سينجل راجل أو سيدة ..
*** مش كل المدارس محترمة ولا كل الادارت تنفع تشتغل معاها .. ف ناس أقل ما يقال عنها (زبالة).. خلي بالك واسأل كويس ..
*** مفيش استقدام أسرة للي شغال ف العمل الخاص طول ما الراتب أقل من 600 ريال ..
*** العيشة مبقتش رخيصة .. لكن كل واحد بيحدد مستوى معيشته ..
*** الشغل 8 ساعات بس اي حاجة زيادة المفروض أوفر تايم أو متقبلهاش.. اعرف قبل متمشي..
*** أسأل هل هيعطوك ورقة عدم ممانعة لو انتهى عقدك لأي سبب ولا لا لان من غيرها مش هتدخل السلطنة قبل سنتين ..
*** كل ما كان اتفاقك ف التعاقد شامل 12 شهر راتب وتذاكر سفر وتأمين صحي كان أفضل..
*** غالبا معظم المدارس اللي بتعطي راتب أعلى من 300 بتقول عليك السكن دي حاجة مش وحشة بس خلي بالك السكن بيبدأ من 120 فيما فوق إلا لو هتاخد سكن شركة مع حد كل واحد غرفة .. وبرضه دا مش وحش ..
*** الأكل والشرب غالبا ف متوسط من ٨٠ : ١٠٠ ريال..
*** مفيش حاجة اسمها هتكلفني المعيشة اد ايه !!!
*** مصاريفك بتختلف حسب المدينة أو المنطقة اللي فيها شغلك زي الفرق بين الحياة ف الريف والحضر كدة كل ما تبعد عن العاصمة هتقول مصاريف وتقل الإيجارات..
*** الريال هناك مش قيمته زي الجنيه خالص .. الريال بيتفك من اول ربع ريال ..
*** لو قارنت وهتعيش تحسب كل حاجة كم بالمصري هتموت قهرا فبلااااش ..
*** مفيش تحويل من جنيه لريال داخل عمان دي عملة غير معترف بيها يتاخد معاك دولار او تاخد ريالات ..
*** الغربة مش سهلة بس مش وحشة .. لو فهمتها واتعرفت ع ناس كويسة ..
*** لو متقي ربنا ف حياتك قبل وبعد متسافر ربنا مش هيسيبك تقع ف ناس غلط .. هينجيك..
*** مش كل مصري ف الغربة وحش بس :( مش كلهم كويسين الغربة بتظهر الأصل اكتر من مصر..
*** الغربة مبتغيرش.. الأصيل ف بلده وسط أهله ثابت كل ما هنالك بتظهر المعادن بشكل واضح ... السيء هنا أسوأ هناك ..
*** عمان بلد حلوة بس مش كلها .. ف أماكن نائية جدا جبال وصحراء غالبا بيوزعه ف توزيع مسابقة الوزارة للمستجدين.. هتكره نفسك لو رحت هناك إلا لو بتحب الوحدة وعايز تحوش بس ..
*** عمان من دبي ولا أبو ظبي ولا الكويت ..
*** عمان أفقر دول الخليج ..
*** أهل عمان حتى الآن هم احسن ناس ف العرب محترمين مع المحترم ومواقفه وحدها بتحدد تعامل الناس معاك .. مبيحبوش الكذاب ..
*** السب والقذف جريمة أكبر من الضرب .. لم لسانك ..
*** وربنا عمان دولة وفيها ناس بتاكل وتشرب وتلبس وتتفسح أحيانا..
( متاخدش معاك اكل من هنا الا لو صنف هتشتاقله) ودلوقت المطاعم والستات المصرية بتعمل كل شيء للي عايز..
*** مش فاكرة حاجة تاني بس لو حد عنده سؤال هحاول اعرف إجابة... :)
دا موقع الوزارة ..
www.moe.gov.net
للي عايز يتابع مسابقة سلطنة عمان للمدرسين .
‫#‏خدمة‬
‫#‏وظيفة‬
‫#‏احذروا_المكاتب‬
فيهم نصابين ومستغلين كتييير اكتر م الكويسين.

اعداد // 
أميرة النمر‏  Egyptians in Oman الجالية المصرية فى سلطنة عمان