ميزة جدول التنقل

جدول التنقل

حوارات وحواديث الملايين في اعلانات التلفزيون المصرية في رمضان

احمد السقا كان عايز كنافة علشان مخدش ,, فخد 5 مليون جنيه علشان يشتري بيهم كل محلات الكنافة اللي في الدنيا

وليلي علوي سألت علي طاهر علشان يحكلها شوية حوارات فخدت 5 مليون جنية علشان تشتري بيهم كل كتب الحوارات اللي في العالم
ومنه شلبي كانت بتنادي علي سمير القصير تسأله على الريموت فخدت 5 مليون جنيه علشان تشتري بيهم توكيل سامسونج و L.G وبي تك :/
وحكيم كان جاي ماشي علشان مش لاقي تكاسي فخد 5 مليون جنيه يعمل مشروع ينافس بيه اوبر وكريم
وكذلك الباقيين ,, لحد ماجت شيرين وعطست في البيت بتاعها لكن مع التوزيع والموسيقي فكرناها بتغني .. وخدت 5 مليون جنيه علشان تبدأ حلمها في مكان تاني وتفتح سلسلة محلات البليلة اللي كانت بتحلم بيها

ويجي واحد تاني يطلع ميتين امه في الشغل شهر بحاله وياخد 1000 جنيه طاير نصهم علي المواصلات والنص التاني علي مصاريف البيت والنص التالت علي مصاريف الدكتور والنص الرابع علي مصاريف المدارس والدروس لدرجة انه مبقاش عارف ال 1000 جنيه فيهم كم نص .. وميبقاش عارف ديونه هيعرف يسددها ولا يجيب حبل ويربطه في رقبته علي كوبري قصر النيل

بلد جميلة ,, كل حاجه وعكسها
علمونا الحقد بسبب عدم المساواة
وعلمونا عدم الإنتماء بسبب قلة القيمة
وعلمونا الفشل بسبب تسريب الامتحانات
وعلمونا الغش بسبب المعقدين نفسياً اللي بيحطوا الفيزيا :/
ده غير كم الاسفاف اللي بنشوفه زي الدندو والبوكسرات والحباية الزرقا ومسلسلات رمضان
ده غير قطونيل .. " من بره زنقة ومن جوه براح "
واعلان كوكي اللي هيبيض ويتجوز بنت خالته

وفي الأخر يقولك اتبرع ولو بجنيه .. واشتري كمباوند بعشرين مليون جنيه
ياخي أ....... ييييييه

إرسال تعليق

0 تعليقات