جولة هدوم العيد .. “الإبراهيمية” و”محطة الرمل” و”باكوس”

 أسعارها مناسبة وكمان ذوقها شيك، إنما فين بقى الأماكن دي ومين أشهرها في إسكندرية ؟
في البداية كل منطقة بتختلف من حيث أسعارها، يعني مثلا عندنا مول “سان ستيفانو”، عند محطة ترام سان ستيفانو، هو مركز تجاري فيه جميع أنواع المبيعات،
من ملابس وأحذية وشنط، بمختلف الماركات العالمية، وفيه أدوات منزلية، ومحلات ذهب، لكن أسعاره بتبقى عالية شوية .

وفي عندنا كمان منطقة الإبراهيمية وشارع “لاجيتيه” الشهير، وده من أشهر الأسواق التجارية في إسكندرية، وأكترها رواجا وشعبية، لأنها بتتميز بأسعارها المتوسطة والمناسبة لجميع الطبقات، وكمان تعدد الموديلات اللي بتناسب معظم الأذواق .
وموجود فيه شارع “لاجيتيه” مول ” مينا مول”، وبيتوافد عليه زوار كتير لأن معروضاته متنوعة ما بين ملابس الأطفال والشباب والبنات، وفيه محلات كتيرة للهدايا والإكسسوارات والأدوات المنزلية، وأدوات العناية الشخصية .
ولو جينا لمنطقة رشدي هنلاقي مول “ديب مول”، وده أسعاره متفاوتة حسب المحلات التجارية، مابين الغالي جدا والمتوسط والمعقول، بس المول ده بيتميز ويتفوق عن غيره في محلات “الطرح”، وفيه فروع أشهر متاجر الطرح وهيا “أوركيدا” و”عثمان” و”فورتين” .
ولو رحنا محطة الرمل هنلاقيها كمان زاخرة بالمحلات التجارية والمولات، ومن أشهر المحلات هناك “مارلين مونرو”، و”ميليون” و”شيكوريل”، وده متعدد الأذواق فيه ملابس حريمي وبناتي وأطفال و”سواريه” وأدوات منزلية، وأهم المولات هناك “سعد زغلول” و”الفلكي” .
عندنا كمان “جرين بلازا” هناك أشهر ماركات الملابس العالمية، وفيها محلات العبابات الشهيرة زي “الخليجية” و”حجابي” .
وفاضل لنا سوق منطقة “باكوس” أو زي ما بيقولو عليها “الصين الشعبية” لانها السوق الأكثر شعبية وازدحام على مستوى إسكندرية كلها، فيها محلات الملابس والطرح والأحذية والشنط، وملابس الأطفال والشباب، وفيها معروضات بتبقى أكثر رخصا من أي مناطق تانية، عشان كده بيبقى الإقبال عليها كبير .
حتى المقتنيات المنزلية لربات البيوت من أجهزة وأدوات ومعدات وحتى الكماليات، بتتجاب أكتر من هناك وكمان مستلزمات العيد المختلفة .

إرسال تعليق

0 تعليقات